IMOMORAMBY

Imomoramby

"Ku mbyja ka'arupy osẽva ha'eñomi

upéichaite remimbi neporãgui che reindy

ahecháva pytũmby torypaitépe resẽ

yvotýpe rejegua ndijavýi ku tupãsy.

Nde nova pytãngymi nde pire katu kamby

ha nde áva hũ asy, oñeñopẽ jovaimi

nde pyti'áre avei hi'aju atã asy

angaiparã che reindy ku mokõi yvamimi.

Ha'ete ku túna aju, pe ne rembe pytãite.

hesénte amano mboyve hi'ãva chéve akambu

nde reko imarangatu, pykasúpe ha'ete

kunu'ũ raity meme, ne ñe'ẽ música pu.

Repukavývo hory nde resa hũ veraite

ha ojeka umi ne rembe ñaimo'ã rosa poty

ha umi jasy kypy'y nde tyvyta mokõive

ikarapã porãite, ¡Ko mba'e imomorãmby!

Ho'a vove pytũmby pe che rokárape asẽ

ha ama'ẽvo nderehe añandu cheangapyhy

hi'ãntepa tupãsy nichomíme romoinge

ha upépe ndéve añoite che mborayhu taipoty.

Maymárõ porãku'i nderehénte ijatypa

ha yvypóra angaiparã Ñandejára nemoĩ

che po'anga'u heñói, pe Tupãme ajerure

¡chemba'erãnteko che, roipota kuñataĩ!"

Autores: Crispiniano Martínez - Emilio Bobadilla Cáceres